معلومات مهمة عن الحجر الصحي
لجنة أطباء السودان المركزية
معلومات مهمة عن الحجر الصحي
أولاً ما اي زول اتعمل ليه حجر معناها مصاب
ليه يتعمل حجر صحي؟
هو من اهم الاستراتيجيات البنستخدمها لمكافحة ومنع انتشار الأمراض المعدية.
هو حجر معناه شنو؟
هو تقييد نشاط وحركة الناس او عفشهم او بضاعتهم وختهم في حتة واحدة.
حيكون الحجر ده لكم يوم؟
بيختلف من مرض للتاني وبعتمد على فترة حضانة المرض يعني مثلا الفترة من زول عنده نزلة ويعطس فيك لحد ماتجيك النزلة، للكورونا بتم عزلك 14 يوم.
مكان الحجر الصحي مفترض يكون عامل كيف ومواصفاته شنو؟
- لازم تتوفر فيه موية وكهرباء
- حمامات مويتها شغالة واحواض غسيل يدين
- غرف نوم
- مطهرات ومعقمات لليدين والملابس وغيره
- كادر متخصص لعناية الناس ومتابعتهم
- احسن يكون فيه وسائل ترفيه عشان الناس ما تمل وتدق جرس
- تتوفر فيه وسائل توعية بالمرض
اها الكوادر دي حتعمل شنو؟
- تتابع حالتك الصحية يومي من قياس حرارة وكشف على الاقل مرتين في اليوم. لازم يكون لابس لبس حماية وكمامة وجونتات
- يطهر المكان يومي بالذات محلات هبيش الناس زي مقابض الابواب، ولازم يكون لابس لبس وقاية وكمامة وجونتات
- ينضف ويطهر عدة الاكل والشراب اذا بقت ما ورقية وبتاعت استخام مرة واحدة
طيب لو داير زول يزورني كيف؟
- اولا مافي حاجة اسمها زيارة سمعت كلامي الزيارة ممنوعة، حفاظاً على الناس الانت خايف عليهم ديل كلهم
- تانيا اذا بقت مسألة حياة او موت بحدد ليك اهميتها الزول المشرف
- الزول الجاييك ده لا يكون عنده ضغط لا سكري لا كلى او اي مرض مزمن تاني، وما بتزورك حامل او طفل اقل من 12 سنة
- يتثقفو بمعلومات كافية قبل يجوك
- بخش ليك نفر او اتنين بس للزيارة في المرة الواحدة
- لازم يلبسو جونتات وكمامة ويقيفو منك بعيد، متر على الاقل
طيب انا كزول محجور مطلوب مني شنو؟
- اسمع كلام الكوادر القاعدة عشانك دي واتعاون معاهم عشان ما تضر نفسك او تضر غيرك
- حافظ على نضافة يدينك وغسلهم باستمرار
- البس كمامتك لو قاعد معاك اي زول او لو داير تطلع من غرفتك
- اذا طلعت من الغرفة البس الكمامة وما تهبش كتير
- ما تشارك زول كباية، ملعقة او صحن
- كلم الكادر الطبي باي شكوى حاسي بيها وما تستهر باي حاجة حسيت بيها.
كل همنا صحتك فساعدنا بسماع الكلام
#واعين_حنسلم_كلنا
إعلام اللجنة
٢٠ مارس ٢٠٢٠
