المنصة الإعلامية الموحدة لنقابة أطباء السودان

المنصة الاعلامية الموحدة لاستعادة نقابة أطباء السودان

كيف حنكون نقابتنا من قواعد الأطباء في الفرعيات (البناء القاعدي)؟

تكوين النقابة ح يكون من الأطباء في المستشفيات والمراكز الصحية، الطريقة دي بسموها البناء القاعدي، بمعنى انو نحن ح نبني نقابتنا دي من القاعدة تحت، ومن قواعدها (الأطباء) صعوداً نحو رأس الهرم (النقيب واللجنة التمهيدية).

كل أطباء في مستشفى (= فرعية نقابة) اذا وصل عددهم لرقم معين يجتمعو مع بعض ويختارو ممثلنهم، وبالتالي ح يكون عندنا ممثلين من كل مستشفى ( = فرعية) .. ف مُمَثِلِين المستشفيات ديل في كل ولاية مع بعض بكونو حاجة اسمها هيئة نقابية، اللي هي الجسم البلم كل الممثلين ديل مع بعض، وعملية اختيار الممثلين من مستشفياتهم بتسمى بالتصعيد.

فمن هنا واضح انو كل الأطباء في كل ولاية هم هيئة نقابية، ما عدا ولاية الخرطوم فهي بتتكون من أربعة هيئات نقابية:

. الهيئة النقابية لأطباء مدينة الخرطوم

.الهيئة النقابية لأطباء مدينة ام درمان

. الهيئة النقابية لأطباء مدينة الخرطوم بحري

. الهيئة النقابية للخصوصيين.

وبنفس الطريقة ممثلي الهيئات النقابية ح يتصعدو عشان يكونو الجمعية العمومية المركزية

طيب المستشفيات الريفية البعيدة والمراكز الصحية الما مستوفية العدد المطلوب حيكون وضعها شنو؟

المستشفيات الريفية، والمراكز الصحية، والمستوصفات، وحتى المعامل الطبية، وأي مرفق صحي عموماً ما فيهو عدد أطباء كافي عشان يعمل فرعية او وحدة نقابية حيتم ضمّو لأقرب فرعية ليها، أو ضمهم مع بعض إذا كانو جغرافياً قريبين لبعض عشان يكونو وحدة نقابية او فرعية.

طيب الجمعية العمومية المركزية دي هي زاتها شنو؟

الجمعية العمومية المركزية هي الاجتماع البضم كل الممثلين المصعدين من الهيئات النقابية، وزي ما تابعت الممثلين ديل بمثلو كل أطباء الولاية/الهيئة النقابية الهم جايين منها، فبالتالي ده اجتماع بتمثيل نوعي ضخم، رايهم بعكس رأي كل الأطباء، عشان كده الجمعية العمومية المركزية دي بتعتبر أعلى سلطة في النقابة، من اجتماعها بتم ترشيح النقيب واللجنة التمهيدية/المركزية.

#الثوره_نقابه_ولجنه_حي

٢٧ فبراير ٢٠٢١