لماذا الانسحاب من مستشفيات القوات النظامية (الجيش، الشرطة، الأمن)؟؟

المكتـــــب الموحـــد للأطبـاء

———————————————————

المكتب الموحد للأطباء 

_________________________________

لماذا الانسحاب من مستشفيات القوات

 النظامية (الجيش، الشرطة، الأمن)؟

الكلام الح نقولو ده كلنا كأطباء عارفينو بحكم تجاربنا الباسلة قبل كدا.. لكن بنعيدو عشان نأكد التزامنا ببنود الثورة للنهاية.

الدولة السودانية كلها مختطفة، بمؤسساتها ومواردها وثرواتها وإرادتها الوطنية والشعبية. والمؤسسة العسكرية نفسها واحدة من مؤسساتنا المختطفة من قبل أجيال من القادة العسكريين المرتهنين لمحاور خارجية تسعى لنهب السودان وتجيير إرادة شعبه. تتغير المحاور ويتغير القادة، و يظل الارتهان والارتزاق والنهب ثابت.

ديسمبر جات عشان تفصل التاريخ هنا. حسمت معركة كبيرة جدا ببطولة وتضحيات جسام، وتبقت معارك أخرى أهمها إسقاط قادة الجيش الانقلابيين القتلة الهسة ديل وبعد داك في معارك ح تحسم حتى تحرير الإرادة الوطنية وبناء الدولة المدنية الديمقراطية وعودة الجيش للمهام المحددة الاتعمل عشانها واتدفع ليهو من حر مال انتاج السودانيين وعرقهم.

انسحابنا من المستشفيات بما فيها مستشفيات تتبع لجهاز الأمن المباد، ومستشفيات الشرطة، مش لأنو المستشفيات دي حقتهم، أبدا دي مستشفيات شيدت من ثروات السودانيين الثائرين لاستعادتها.. 

لكن انسحابنا منها هو رفض للعمل تحت إشراف أي انقلابي بيقتل شعبه، وبيرفض استقبال المصابين في مستشفيات هو يتخيل انها حقتو، ده زي ما حصل في #مليونية30اكتوبر لما نفس القادة أمروا بضرب الرصاص الحي على الثوار ورفضوا يستقبلوهم. ديل ما قادة نشتغل في مستشفيات تأتمر بأمرهم أبدا.

نحن منسحبين من المستشفيات دي ومتفهمين انو في صغار ضباط وجنود في الجيش والشرطة ممكن يحتاجو رعاية طبية طارئة في أي لحظة، وديل مرحب بيهم في مستشفيات الشعب المحررة نستقبلهم في الطواريء ونعالجهم.

ودي من هنا رسالتنا لصغار الضباط وجنود الصف في القوات المسلحة وفي قوات الشرطة، ختوا في بالكم انو القادة البدوكم تعليمات قتل وقمع لشعبكم ديل هم ساقطين لا محالة، والمؤسسة العسكرية حقة الشعب ح ترجع مؤسسة وطنية وإن طال سفر الثورة، ونحن عارفين إنكم ح تقيفوا في الجانب الوحيد الصحيح من التاريخ، جانب الشعب وجانب الشهداء وجانب الثورة الذي لا يخطئ.

الأطباء الأماجد،

مكتبكم الموحد ملتزم بما تأمر به الثورة ولجانها الحية، انسحابنا من مستشفيات القوات النظامية كلها ح يظل قائم في موازاة استمرار #العصيان_المدني_الشامل والإضراب عن الحالات الباردة في مستشفيات وزارة الصحة، ده لحد اسقاط النظام العسكري الانقلابي ومحاكمة قادته واستكمال بنود الثورة واسترداد السلطة والثروة كاملة للشعب، وإقامة النظام المدني الديمقراطي العادل.

بالنسبة للقادة العسكريين في ادارات المستشفيات، تأكدوا انو انتو ما عندكم الحق باتخاذ أي إجراء إداري ضد أي طبيب منسحب. ولا عندكم الحق بالتهديد. تأكدوا انو كل شيء مرصود من قبلنا.

#الردة_مستحيلة

#كل_السلطة_والثروة_للشعب

_________________________________

مكتب الأطباء الموحد

            ((#اقرا_شارك_اتصل)) 

#الردة_مستحيلة

#مليونية30اكتوبر 

#كل_السلطة_والثروة_للشعب 

#العصيان_المدني_الشامل

                      #AgainstMilitaryCoup

                                      #SudanCoup

١ نــــوفمبر ٢٠٢١

—————————————————————

المكتـــــب الموحـــد للأطبـاء