موجهات صحية لــ #مليونية6أبريل

News Apr 5, 2022 0 487 Add to Reading List

المكتـــــب الموحـــد للأطبـاء

———————————————————

موجهات صحية

#مليونية6أبريل

((—-كيف تسعف المصاب—-))

⭕️ لو زول اتضرب جنبك أول حاجه حركوا من مكان ضرب النار لمكان آمن

⭕️ حاول تحافظ على المصاب ثابت قدر ما تقدر وما تحركو كتير

⭕اطلب بأعلى صوت من الحولك إحضار نقالة لإسعاف المصاب

⭕️ حافظ على الرأس في نفس مستوى الجسم إلا لو كانت الإصابات في الرأس أو الرقبه، في الحالة دي أفضل يكون المريض قاعد أو واقف لانو لو اتمدد ممكن يزيد عليهو النزيف

⭕️ حاول تتكلم مع المصاب وأساله عشان تتأكد إذا كان واعي ولا لأ. لو كان ما واعي حاول تفوقه

⭕️ لو ما فاق حاول تتأكد أنو بيتنفس عن طريق إنك تقرب أذنك لخشمو وتحاول تسمع صوت التنفس أو تحس بيهو في نفس الوقت عينك على صدره عشان تتأكد بيتحرك ولا لأ.

⭕️ إذا كان المصاب بيتنفس لكن ما واعي أفتح خشمه أتأكد إنو لسانه ما سادي مجرى التنفس لو كان ساديهو حرك الرأس يمين أو يسار. بعدها أرفع ذقنه لفوق، لو كان خشم المصاب أو أنفه مليانه بالدم فنحاول نفرغه عشان ما يتخنق

⭕️ وأنت بتنقل في المريض حاول تثبت الرقبه بطريقه صاح عشان ما يحصل اختناق بالدم أو اللسان ( تسند الرأس وتخلي مجرى التنفس فاتح)

⭕️ لو المصاب ما كان واعي حاول تقلع ليهو ملابسه عشان تتأكد إذا في أي إصابة أو رصاصة تانية

⭕️ إذا لقيت أي مكان بتاع نزيف أضغط عليه بقوة بقطعة بتاعة قماش نظيفة

⭕️ لو القطعة الوقفت بيها النزيف اتملت بالدم ما تغيرها بواحده تانية. خت فوق ليها قطعة جديدة عشان لو شلتها ممكن تشيل التجلط الحصل والنزيف يزيد

⭕️ لو كنت في حته فيها تلج، أربطه في كيس وخته فوق الجرح عشان يقلل الدم

⭕️ لو كانت الإصابة في اليد أو الرجل وبدأ المريض ينزف أربط الحته المصابة من فوق مكان النزيف وأنقله لأقرب مستشفى فوراً.مهم في الحاله دي ترفع اليد أو الرجل أعلى من مستوى القلب مثلاً أسندها في الحيطه أو ارفعها في مخدات عشان تقلل النزيف

⭕️ لو كانت الإصابة في الرأس ما تضغط على الجرح شديد بس أضغط بشكل جزئي. خلي جزء بسيط من الدم يطلع عشان ما تزيد ضغط الرأس.

⭕️ لو كانت الإصابة في الرقبة انتبه وانت بتوقف النزيف عشان ما تضغط شديد لدرجه توقف التنفس أو حركه الدم

⭕️ لو كانت الإصابة في الصدر أو البطن غطي مكان الإصابة كويس وقلل النزيف بإنك تضغط عليه وتنقله لأقرب مستشفى

⭕️ في حالات الإصابة فتش الفرق الطبية المعاك في الموكب وما تنقل المريض إلا للمستشفيات المعتمدة والحيتم نشرها من المكتب الموحد. لأنها المستشفيات الوحيده البنقدر نأكد ليك إنها شغاله ومستعدة لاستقبال الإصابات

⭕️ في حالات الحريق أقلع ملابس الشخص المصاب وإذا شعر بالبروده غطيه ببطانيه أو قماش تقيل

⭕️ أعمل حسابك من علب القنابل الصوتية لأنو بتشبه علب البمبان وممكن تنفجر وتسبب فقدان الأطراف

أبقو عشرة ..وقــــدام بس

إن شاء الله ما نفقد نفر

#زلزال6أبريل

#الردة_مستحيلة

#لاتفاوض_لاشراكة_لاشرعية

#AgainstMilitaryCoup

#SudanCoup

6 أبريل 2022

—————————————————————

» لجنة أطباء السودان المركزية